التربية واختلاف الطبائع

لما بدخل جروبات زي التعليم المرن أو أي جروبات فيها تربية يعني وبشوف أسئلة الناس ..زائد الحاجات اللي بحاول أقراها في موضوع التربية عموما..

بحس أكتر خطأ يعني بيحصل في تربية اﻷطفال هو عدم تفهمنا لفكرة الطبائع..واختلاف الشخصيات. ودي نقطة مش في التربية بس يعني..في التعامل مع البشر بس يمكن في التربية هي أكتر حاجة تخوف..ﻷن لو حد غريب غلط في التعامل معك في النقطة دي ..قشطة أبعد عنه ..تجنبه أي كان..بس لو أهلك اللي بيربوك؟ ..بتهيألي سهل تطلع معقد على الفاضي يعني ..على حاجة متستهلش أساسا

أقصد بأخطاء التربية والطباع مثلا..لما أم تبقى بتشتكي وشايفة أن بنتها مش اجتماعية مثلا وأنها منطوية لمجرد أن البنت مختلفة عنها في فكرة تكوين العلاقات. يعني اﻷم مثلا كانت بتحب تبقى عارفة طوب اﻷرض وتسلم على دي ودي وديما متابعة الناس وكدة..

على عكس البنت عندها تدرج مختلف في الثقة في الناس وتقريبها لها وبتكتفي بصديقة واحدة مثلا مقربة..

ممكن أم تاني مع بنت العكس..هي اﻷم اللي بتثق في عدد قليل ويصل لدرجة الصداقة المقربة..بينما البنت بتحب تبقى عارفة الكل وأي كان الهيكل يعني..فاﻷم تحسس البنت وتشتكي أن البنت مش ناصحة..مش عارفة تعرف الناس بشكل كويس..هتصاحب ناس كتير يبوظوها..أي كان يعني..

بينما هو مجرد اختلاف طباع؟

كان فيه مثلا من فترة واحدة بتسأل عن بنتها أنها غريبة جدا في الفصل مستواها كويس بس معندهاش روح التحدي يعني لا بتفكر تطلع في أوائل ولا غيره وميفرقش معاها حد يبقى أشطر منها وكدة ..وأنها عايزة تعلمها روح المنافشة :D وجو اﻷوائل وكدة..وشايفة أن ده عيب في البنت وأنها مش طبيعية

أنا عموما كنت شبيها بالبنت دي وأنا صغيرة في المدرسة ..فاستغربت يعني لما لقيت اﻷم معتبرة ده عيب ومستغرباه..وبقيت في ذهني "بشكل إنساني طبيعي" ..بدافع عنه وبقول بالعكس يعني أنا محبش ابني لما ربنا يرزقنا يعني يبقى غلاوي بقى وبدل ما يبقى كلنا نبقى شاطرين عادي ونكمل بعض يبقى جو التحدي..وووو

وبعدين وأنا براقب أفكاري يعني..لقيت أن أنا حطيت نفسي مقياس..وبقى هو ده الطبع السليم وأي طبع مخالف بقيت هطلع له حاجات غريبة من "غلاوي".."منطوي" .."سازج" ..على حسب الموقف يعني..

وساعات العكس..لو أنا مثلا كنت خايبة في المدرسة نفترض وكانوا العيال بيحطوا عليا..ممكن يبقى الحاجة اللي كنت عايزة أوصل لها مثلا زي شخصية اﻷول على الفضل..تبقى هي الطبع اللي شايفاه مميز والباقي معيوب..

يعني مش شرط أكون بقارن بنفسي..

هي الفكرة أن اعتبار أن طبع واحد هو السليم والباقي هنطلع فيه عقد الدنيا..

ده غير يعني اختلاف الظروف والطاقة والشخصية والقدر ذات نفسه

فاللي بيحصل أن اﻷم - اﻷب أو المجتمع بيعامل الطفل من هو صغير على أنه مش طبيعي ومحتاج تعديل سلوك على حاجات هو أصلا مش مطالب منه يكونها فيه أو يلغيها أنما يسبها تكبر كدة وينميها له بشكل صحي ..يعني يحطه في مناخ آمن يعني ولا يعني ذلك ميعرفوش على الطباع التانية..بس أقصد لو الولد مرفوض من أهله عشان طبع فيه ..طبيعي يطلع معقد ..أو مهزوز..على عكس أهل تانين كانوا أكتشوا الميزة في الطبع ده يعني.

وللأسف قبل ما اﻷهل بيعملوا الضغط ده على ولادهم فالناس بتعملوا عليهم اﻷول..

تلاقي أم يدوبك ابنها لسة سنتين والناس تدخل كل ما يزروها..إيه ده هادي أوي..لا يطلع منطوي..إيه ده شقي جدا..خديه لبتاع تعديل سلوك..إيه ده مش رغاي ليه؟ ده ابني لما كان قده كان بيكلم ويتناقش وبتاع..إيه ده رغاي كدة ليه؟ :D ..يعني أي كان إيه..كل حد من الناس هيقارن بنفسه وبتربيته وكأن ده اﻷصل وكأن مينفعش نطلع مختلفيين يعني..فاﻷم تحس بالضغط والقلق وتطلعه على عيالها بعد كدة..

وده نفس اللي الكبار بتعرضوا له في أبسط المواقف يعني..بيحطوا لبعض عناوين تضيق على الناس حياتها.

فيه ناس اساسا لو واحدة جالها برد وحسسها البرد أنها مش قادرة تنزل أو أي كان..هتلاقي حد يقولها فيه إيه..ما أنا لما بيجي لي برد بعرف أنزل عادي ومش لازم التقوقع وبتاع وو

فمبالك باﻷمور الكبيرة يعني

واللي هو عادي يا جماعة كل واحد له حاله..كل واحد له أولولياته..وكل واحد له نظرته..وطباعه وشخصيته وهكذا

ويس