"لَّا يُحِبُّ اللَّهُ الْجَهْرَ بِالسُّوءِ"

بسم الله،

كنت بتفرج على علامات الساعة الصغرى لعمر عبد الكافي..وقال أن من أول العلامات: "الفحش والتفاحش"..

فكان بيشرح إيه الفرق ما بينهم..

فقالك أن الفحش مثلا..زي أن عارضة أزياء يبقى لها صور من غير حجاب وبتاع وكدة... (أو مش عارضة أزياء عادي يعني ..)

أنما التفاحش..هو نشر ده بين الناس!

وشرح أن الفحش مرحلة..والتفاحش مرحلة أوحش يعني.

--

الحمد لله من 9 سنين كنت قررت أبطل فرجة على المسلسلات واﻷفلام (خالص) والحمد لله ده سبب تغيرات كتير في حياتي سعيدة بها..بس من آثار القرار ده..أني بشوف المناظر اللي الناس بقيت بتعتبرها عادي في المسلسلات واﻷفلام ..حاجة عيب أوي

فتقريبا أول رمضان كنت أتفصلت جدا (وتقريبا مش أنا وحدي) من كم الصور اللي من المسلسلات اللي الناس بتعمل لها شير عندي..وكنت مقضياها "hide" ومش عارفة مين فاضل معملتلوش hide..

ولا المشكلة أكتر في سيناريو المسلسلات اللي الناس عمالة تكتبه..

ومش عايزة أقول قصة من اللي قريتهم يعني..

بس السيناريو على الدروس المستفادة..كلها "فحش" حقيقي..

اللي هو الناس بقيت بتقر بافكار تدمر دينها ومجتعمها أكتر.

--

فبدل مثلا

الواحد يدخل يشوف صحابه بيعملوا إيه..يلاقي اللي بيصلي التراويح طول الليل..واللي ختم من أول أسبوع وداخل في خاتمة تانية..واللي نازل تطوع وبيجري على لم صدقات للناس..واللي في درس دين...فيستغغر ويقول لا لازم أشد شوية ده أحنا في رمضان..

يدخل يلاقي قصة دي على القصة دي..اللي هي أقل ما فيها..أقل أقل ما فيها يعني..بتشغل عن ذكر الله.

اللي هو كان فيه آية بتقول " ومن الناس من يشتري لهو الحديث ليضل عن سبيل الله بغير علم ويتخذها هزوا أولئك لهم عذاب مهين "

اللي هو نزلت اﻵية أصلا في ناس في مكة كانت بتحكي قصص في الطريق للبيت اللي كان الرسول فيه بيدعوا المسلمين للدين ويفهمهم العقيدة في أول الدعوة..فكانوا يفضلوا يحكوا في قصص وبتاع عشان الناس تنشغل في السكة ومتروحش 

فده أقل ما فيها يعني..

أنما اﻷوحش هو الفحش اللي فيها..

سواء المناظر اللي لا ترضي الله...اللي دليل أنها بقيت وحشة جدا أن الناس أصلا مبقتش بتعتبرها مناظر يعني..واللي بالمناسبة مشكلتها مش على الولاد بس..أنما على البنات كمان..والمجتمع ككله في تخيل الحلال والحرام وحبه وكره..

أنما كمان في محتوى القصة نفسها..اللي الدروس المستفادة في الخلفية فيها كلها أوحش من بعضها..وكلها تبعد عن طريق الله أكتر..

وكل ده مجرد فحش..

بس متخيل أنك أنت اللي لما تفضل تكلم عليه بقى وتنشره وسط الناس أكتر ..ده التفاحش..

يعني متخيل أن لو هما عملوا كدة وأنت شفته في سكات..ده مجرد فحش..أنما لما تنشره فأنت عملت المصيبة اﻷكبر لوحدك وهي التفاحش؟

ولا حول ولا قوة إلا بالله.

"وَاللَّهُ يُرِيدُ أَن يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُوا مَيْلًا عَظِيمًا "

فلو ببساطة تفكر قبل أي حاجة ناوي تنشرها وسط الناس..دي الرسول صلى الله عليه وسلم لو بيشوف بروفيلك بقى أو جنبك أو أي كان..بالمنطق كدة حتى وأنت مش عارفه ولا عارف شرع ربنا للدرجة..ترضيه ولا لا؟

وبعدين أفتكر أن الله هو خالق الرسول شايفك علطول فعلا..وخالق ملايكة متابعك ليل نهار وبتكتب كل حاجة بتعملها...فمشاهدة الله يعني مفروض يبقى لها وقع دايم عليك أكتر وأشد.

فربنا يغفر ويرحم ويسامحنا يا رب.

ووجب التنبية أن ده مش على المسلسلات بس أنما كل أفعالنا..عمل الغلط خطوة ..أنما نشره خطوة أكبر بكتير. "لَّا يُحِبُّ اللَّهُ الْجَهْرَ بِالسُّوءِ"