العمل الحر: ما قبل البداية (0)

السلام عليكم

الحمد لله زي الفترة دي من 3 سنين بدأت شغل كعمل حر أون لاين

وعن قناعة بأهمية النظام ده في الشغل لي يعني بشكل خصوصي..وأهميته في شكل المجتمع اللي وصلناه يعني 

وكانت تجربة حلوة جدا الحمد لله في خلال التلت سنين الحمد لله ربنا وفقني ويسر خير كتير يعني...وبدأت أدخل أعرف ناس قريبة مني يعني بالموضوع ونجاحوا فيه وفي الشغل اللي معه بدأت أخد دور أن أنا اللي أقيم غيري وأشوف هيشتغل معانا أون لاين ولا لا يعني..

فكنت قررت يعني كشكر النعمة أن أبدأ أساعد غيري يعرف الدنيا خصوصا أن الواحد من برة قبل ما يبدأ بيبقى عنده أفكار كتير غلط والدنيا مش مظبطة يعني..وبدأت أكتب فعلا فترة على جروب Freelance for Arabs والحمد لله يعني تجاوب الناس كان حلو جدا..واللي يحب ممكن يقرأها غطت كتير.

بس يعني كان فيه شوية سلبيات زي الرسائل الكتير وبعض أنواع اﻷسئلة وضيق الوقت اللي بيتسبب من ده والتشتت يعني خلاني أوقف فترة..

بس قريب يعني كل شوية أحاول أفكر نفسي أن لازم أبدأ أكتب بنظام تاني عن الموضوع وألخص الليلة.

فاللي حابب يقرأ في الموضوع ده أكتر يبقى يتابع على المدونة بإذن الله 

وممكن نعتبر دي أول حاجة عنه ..مجرد

1. بعلن النية يعني بما أنها بقالها شهور بس بكسل..فكنوع من تشجيع النفس يعني.
2. عايزة أعرف أسئلتكم اللي عايزين تعرفوها عشان أبدأ باﻷهم لكم يعني.
3. توضيح بعض اﻷمور في اللي هيتكتب..زي أن هيتم التركيز شوية على جانب ليه عمل حر أصلا بشكل ثقافي أو فكري شوية. وأغلبا هيبقى متأثر أكيد بأني بنت ..فمواجهة للبنات أكتر.
4. أنا في اﻷخر أشتغلت عن طريق UpWork بس..وبأصر أنا يعني أفضل عليه بس حتى اﻵن. ولكن التجربة هتبقى متأثرة بده يعني. وأكيد في اﻷخر مجرد تجربة شخصية.
5. ديما هرد على اﻷسئلة اللي في التعليقا على الكلام نفسه..سواء الفيسبوك أو المدونة..بس مش هرد على رسائل خاصة يعني :D وده منعا للتشتيت والسلبيات اللي بتعطل الموضوع سواء استنزاف الوقت أو الاستفزاز أحيانا من بعض طرق اﻷسئلة وغيره يعني..
6. أحبذ عدم مشاركة غير البنات بالتعليقات أو اﻷسئلة يعني
7. لو اﻷسئلة زادت مش ديما هعرف أرد على سؤال سؤال..ولكن هقرأهم كلهم وأكتب على أساهم التدوينات القادمة يعني..

بنبدأ بالكلام ده اللي يعتبر ما قبل البداية ومجرد استطلاع رأي على اﻷسئلة اللي عند الناس أصلا اللي بتدور في الموضوع إيه.