منظومة متكاملة أم متقطعة؟

من الحاجات المنتشر عليها كلام كتير هي فكرة أن لو لا قدر الله "بنت أتعاكست في الشارع" ..مبقاش فيه رجالة تدافع عنها..

ويا سلام لو واحد معدي بدقن..فين دينه اللي بيقول عليه مش مفروض يدافع عن حُرمة البنت.. الحُرمة بالمعني اللغوي.

وعلى قد ما الجدال مقنع ويطبق على ناس كتير فعلا..إلا أن فيه شريحة من الناس مش صغيرة هي اللي تم توصيله للحالة دي..بأخطاء من نفس الناس اللي بتطلب منهم يبقوا رجالة يعني..

الفكرة أن دينيا فيه مبدأ قرآني بيقول: "كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللَّهِ ۗ"

فبالتالي خَيْرَ دي مش عشان أنتم مسلمين والباقي كفرة..ولا عشان بتصلوا كتير بليل..ولا في الحج عددكم بالملايين وأكبر تجمع بشري مثلا ..ولا أي من ذلك..كأمة ببساطة هو فكرة "اﻷمر بالمعروف والنهي عن المنكر"..

يعني ببساطة لو فيه بنت بتتعاكس ..هيحصل نهي للولد اللي بيعاكس صح؟ ونأمره كمان بغض البصر وهكذا

هو الفكرة في وجهة نظري ناقصها نقطة محورية جدا..

وهو أن اﻷمر بالمعروف..والنهي عن المنكر..لما يبقى قاعدة عامة..عقيدة مسلمين..يبقى الطبيعي أني أنهى عن المنكر "كله" وأمر بالمعروف "كله"

بناء على ديني كمسلمة..مش كأي حاجة تانية..عشان يبقى سمة رئيسية تتوصف بها اﻷمة..مش مجرد نهي عن بعض أفعال متفرقة يعني أو حاجات معينة في دين حد تاني..

هل معنى كدة أن مثلا شايفة المعاكسة حلال؟ :D أكييد لا ..هو وش لازم يبقى فيه نهي عنه..

بس النقطة اللي بكلم عليها أن لو أنا هبدأ أطبق ده وأبقى من اﻷمة دي..وأنت شايف أني مفروض أبقى كدة..فأنا هبقى بناء على ديني في كله..يعني مينفعش تقولي لا لا فكك مفيش نهي هنا ولا هنا ولا هنا..بس في دي بقى..دي تبع دين العلمانية والمواطنة والدولة ..فيا ريت تيجي بقى توريني النهي هنا

طبيعي مش هينفع..بس مش ﻷن أنا ديني أمرني بكله فأنا لما هتوقفني في أكتر من موقف وتمنعني من تطبيق المبدأ ..هعند مثلا وأقولك طيب والله ما أنا مكلم ومش مدخل خالص..مش دي النقطة

هي النقطة أن النهي عن المنكر وأمر بالمعروف بيكمل بعضه كمان..

يعني ببساطة..

عامل زي ولد بيستفز واحد بالكلام..فراح التاني ضربه..في حضانة مثلا

فأنا أه أكيد اللي ضربه غلطان..بس لو فضلت أقول للي ضربه متضربش وأنت غلطان وبس وحده.."بس"..المشكلة مش هتتحل يعني..أنما محتاجة أكلم الاتنين ..اﻷولاني بلاش استفزاز وأهمية الكلام الطيب والنفس الطيبة وبتاع..والتاني أمسك نفسك لما حد يستفزك وحتى لو لك حق ..ديما تفتكر أن مش من حقك تاخد أكتر من حقك ده أساسا..

أنما لو أجي أكلم اﻷول تقولي ملكش دعوة ..والتاني تأمرني أكلمه علطول..فغير أن أنت بتمشي قوانينك عليا يعني..التاني أساسا في لحظة هيجي يضربني أنا بدالك..وأنت مدام مش متعاون معايا ..أخسر نفسي ليه عشانك؟

عموما يعني..فنفس الفكرة..واحدة مش عاملة شرط العفة في لابسها بشكل كامل أنا عليا في ديني أمرها بالمعروف وأنها عن المنكر زيها بالظبط زي اللي مش بيغض بصره يعني..

نفس الفكرة في كل حاجة بالمناسبة..

يعني زي ما فيه أمر للفقير أنه ميسرقش..ففي أمر للغني أنه ميتفاخرش بماله بشكل مستفز للفقير

يعني أساسا فيه نقطة زي أن في اﻹسلام كان وقت الرسول فيه نهي عن أن الراجل يلبس لبس طويل بزيادة..ﻷن في المجتمع بتاعهم كان دي علامة من علامة التفاخر يعني..اللي هو أنا أغنى وبجيب هدوم أزيد..

فهتلاقي أحاديث ووصلنا كتير عن الموضوع..وفيه ناس حتى بيتبعوا فكرة تقصير الثوب، البنطلون للرجالة حتى اﻵن..

فهو اﻹسلام مش بينهى طرف ويسيب التاني براحته..

ده حكم مجتمعي على كل..متكامل يعني.

فزي ما هقول للفقير مينفعش تسرق، هحجم الغني أنه ميستفزش غيره في المجتمع..وده يعني بعيدا عن كم اﻷحكام التانية من فقه وزكاه وغيره.

فأنت لما كل واحد يجي ينهى مثلا بنت عن لبس معين، واحدة قلعت الحجاب، ناس بيعمله أي حاجة غلط..وتقول ملكش دعوة بشكل متكرر وخليك في حالك..يبقى تقبل أن الشخص ده يتعود أنه مش من اﻷمة بتاعة اﻷمر بالمعروف والنهي عن المنكر..بس ما علمته أن في حالك وملكش دعوة يعني :D

كون أنت عامل دين جديد..فيه حاجات ينفع بقى وحاجات لا مختلفة عن دينه..فهو حر ميتعاملش بدينك وميتأذاش بسببك لمجرد أنك عايز حتة وحتة لا يعني.

حد فاهم حاجة؟